Los Campus Multideportivos qu’entama’l Patronatu Deportivu Municipal de Gijón/Xixón tienen como finalidá fundamental l’enseñu de formes nueves d’actividá física y d’ocupación nel tiempu llibre. Amás, persiguen tamién el desarrollu d’actitúes de responsabilidá individual y coleutiva, fomentu del trabayu n’equipu, deprendizaxe d’hábitos hixénicos y d’actividá física saludable; mesmo que contribuye a la conciliación de la vida familiar y llaboral de les families.
Empobináu a neños/es d’ente 5 y 7 años estableció una serie d’oxetivos como’l perfeicionamientu d’habilidaes motrices básiques y iniciación de les específiques de dellos deportes, xunto col desarrollu de cualidaes motrices (coordinación, equilibriu y axilidá).
La metodoloxía de trabayu adáutase a la competencia motriz y edaes de los participantes y básase nel descubrimientu guiáu y la busca de soluciones por parte del neñu/a fomentando valores d’igualdá, pluralidá de roles y corresponsabilidá. La programación d’actividaes de los campus constitúyese, principalmente, poles modalidaes y xuegos que s’imparten albentestate o nel mediu natural y, al empar, promociona la socialización ente les y los participantes.
El personal a cargu del serviciu tien formación y esperiencia na organización de numberosos campus deportivos y, amás de la impartición de les actividaes dende les 9 hores de la mañana hasta les 14:30 hores, toles persones participantes van recibir un picnic a media mañana pa recuperar enerxía.
Configúrense dellos turnos de cada campus, caún d’ellos va facese nes instalaciones deportives municipales d’un barriu concretu de la ciudá. Los conteníos xenerales estructúrense acordies colos neños/es a los que se dirixe’l campus, y son los que siguen:
- Xuegos tradicionales
- Predeportes
- Deportes recreativos
- Espresión corporal y ritmu
- Manualidaes (papiroflexa, globos, nuedos…)
Amás, nel campus de más pequeños ta prevista una sesión d’adautación al mediu acuáticu en piscina tolos díes.