Los Campus Multidisciplinar qu’entama’l Patronatu Deportivu Municipal de Gijón/Xixón cola collaboración de Participación Ciudadana tienen como finalidá fundamental l’enseñu de formes nueves d’actividá física y d’ocupación nel tiempu llibre. Amás, persiguen tamién el desarrollu d’actitúes de responsabilidá individual y coleutiva, fomentu del trabayu n’equipu, deprendizaxe d’hábitos hixénicos y d’actividá física saludable; mesmo que contribuye a la conciliación de la vida familiar y llaboral de les families.
Configúrense un par de turnos d’esti campus con distintu nivel d’inglés acordies cola edá de les y los participantes, ún pa neños/es d’ente 8 y 11 años y otru pa neños/es d’ente 12 y 15 años, que se cellebren nes instalaciones del CMI El Llano y el CD El Llano–Contrueces, mesmo que n’espacios albentestate. Los sos conteníos xenerales preséntense de siguío:
- Deportes reglaos y de calter recreativu, xunto con actividaes nel mediu natural.
- Introducción al mundu del teatru y les artes escéniques.
- L’inglés como llinguaxe de comunicación.
- La seguranza n’Internet.
- Talleres de cocina.
- Xuegos y actividaes acuátiques.
Amás, ta prevista una sesión d’adautación al mediu acuáticu en piscina tolos díes y van facese bautismos o iniciaciones en delles disciplines deportives como equitación, kayak de mar o surf.
No que fai a los oxetivos específicos d’esti campus empobináu a neños/es de 8 a 15 años, tán la iniciación y perfeicionamientu de téuniques y de táutiques de dellos deportes, el desarrollu d’hábitos alimentarios saludables, la esperimentación de les posibilidaes espresives del cuerpu humanu de forma espontánea, el fomentu de la educación, la cultura y la participación responsable, l’usu responsable d’Internet y el disfrute del mediu acuáticu al traviés del xuegu.
La metodoloxía de trabayu adáutase a la competencia motriz y a les edaes de les y los participantes y básase nel descubrimientu guiáu y la busca de soluciones per parte del neñu/a fomentando valores d’igualdá, pluralidá de roles y corresponsabilidá.
El personal a cargu del serviciu tien formación y esperiencia na organización de numberosos campus deportivos y, amás de la impartición de les diferentes actividaes dende les 9 hores de la mañana hasta les 17 hores, tolos participantes van recibir un picnic a media mañana pa recuperar enerxía. Amás, esti campus incluye serviciu de comida formáu por primer y segundu platu, postre, pan y bebida.
