L’actividá empieza con un audiovisual a mou de videoconferencia col famosu investigador Xustu Eméritu Sesudu Cabal, catedráticu en Misterios y Investigación pola Universidá Autónoma de Vetusta y doctor en Claves y Criptogrames, que esplica a les y los escolares participantes lo que s’alcontró ente los papeles de Jovellanos: una carta unviada pol ilustre xixonés al so amigu Goya poco enantes de morrer na que lu fai partícipe del so gran secretu.
Un secretu que va haber que descubrir, porque’l mensaxe ta encriptáu y hasta agora naide nun supo descifralu. L’ayuda de les y los escolares, agora convertíos n’investigadores, va ser fundamental. La clave pa decodificalu ta venceyada con feches importantes na vida d’esti personaxe, colo que va ser necesario rastrear la so biografía pa descubrilu.
Pa facilitar la investigación esplíquense-y al alumnáu les carauterístiques y les téuniques de busca d’información n’Internet, y apúrrese-yos un póster dixital con enllaces a distintos documentos, ellaboráu arré pa l’actividá.
La resolución del criptograma y el descubrimientu del secretu -que namás damos a conocer a les persones que participen nesta actividá- llévanos a una conexón nueva con Xustu Eméritu na que se descubre que foi too un xuegu y que la famosa carta nunca nun esistió, anque haya estudiosos de la figura d’esti ilustráu qu’afirmen que ye verdá. Tou un misteriu qu’igual nunca se resuelve del too.
El secretu de Jovino ye una actividá de formación nel usu de la biblioteca dirixida a grupos d’escolares de 6u cursu d’Educación Primaria de los centros educativos de Xixón.
El profesoráu puede contautar cola biblioteca más cercana al so centru educativu pa facer la solicitú al traviés d’esti trámite. Va facese una solicitú por cada actividá demandada y clase. El personal bibliotecariu va informar sobre qué actividaes ufierta cada biblioteca y va asignar les places n’estudiando la demanda.
