La Rede Municipal de Biblioteques de Gijón/Xixón desarrolla actividaes en collaboración cola comunidá educativa de la ciudá al traviés del programa Entrebiblios.
Entrebiblios promueve la creación d’aliances interbibliotecaries pa trabayar nel oxetivu común de fomentar la llectura. Les llinies d’actuación básense na realización d’actividaes conxuntes, la creación y organización de recursos, l’empréstamu coleutivu de materiales pal desarrollu de proyeutos escolares y l’asesoramientu téunicu y bibliográficu.
Como nun binomiu fantásticu, les sinerxes que nacen d’esta rellación proporcionen a les biblioteques escolares y públiques el puxu necesariu p’afrontar retos nuevos, respaldaes pola cooperación col CPR Gijón/Xixón-Oriente.
Demientres el cursu escolar faense en toles biblioteques de la rede municipal de Gijón/Xixón actividaes col alumnáu d’Educación Infantil, Educación Primaria y ESO de los centros escolares de la ciudá qu’amuesen, nun ambiente lúdicu, estimulante y prestosu, toles posibilidaes y recursos qu’ofrecen les biblioteques. Nelles emplégase una metodoloxía participativa y cooperativa, y úsense recursos y ferramientes dixitales.
Actividaes empobinaes de mou especial a les y los escolares d’Educación Infantil nes que los álbumes ilustraos y los personaxes infantiles garrren protagonismu como mediu p’averase a la biblioteca.
Secretos, pantasmes, bandíos, viaxes nel tiempu, xuegos y munchu más son los elementos qu’aporten l’ambiente perfeutu pa que les y los escolares d’Educación Primaria deprendan y esfruten nestes actividaes.
L’alumnáu d’Educación Secundaria Obligatoria va vese inmersu nun safari dirixíu pol personal bibliotecariu nel que va deprender a movese y a tener autonomía nesi espaciu.
L’actitú lúdica del trabayu en biblioteques conlleva la creación y puesta en marcha de xuegos y retos llectores col oxetivu d’animación a la llectura, que tien a les biblioteques escolares como aliaes.
.
Pa conocer la biblioteca, pa disfrutar d’un Espocuentu o bien “a la carta”, les biblioteques municipales de Gijón/Xixón ofrecen esti serviciu a la comunidá educativa.
La biblioteca pública ye una aliada de la biblioteca escolar y ofrez al alumnáu y a les sos families un sitiu d’alcuentru pal desarrollu de les tarees dempués de les clases. En toles biblioteques se dispón d’espacios pal trabayu individual o en grupu, d’equipos informáticos, conexón de baldre a internet, un serviciu d’impresión y fotocopia, asina como l’apoyu téunicu del personal bibliotecariu.
Delles de les veces la biblioteca puede mediar y collaborar con otres entidaes nel desarrollu d’aiciones estables d’apoyu a escolares que necesiten ayuda na realización de les sos tarees.
Los centros educativos pueden solicitar a la biblioteca del so área de referencia l’empréstamu de lotes de llibros y otros materiales como apoyu a los sos proyeutos curriculares. La biblioteca ofrez asesoramientu bibliográficu pa la seleición de los materiales que van formar el lote d’empréstamu.
El personal bibliotecariu puede asesorar y proporcionar información téunica y bibliográfica al profesoráu. Esti serviciu articúlase al traviés del trámite de solicitú que puede adoptar delles fórmules, dende conversaciones informales, solicitúes d’información al traviés del corréu eleutrónicu, o reuniones formales concertaes con antelación.
Organizaes por temes y por tramos d’edá, les guíes ofrecen recomendaciones bibliográfiques en papel y en formatu dixital qu’orienten na seleición de llectures.
guías infantiles guías juveniles
