Los Servicios Sociales del Ayuntamientu de Gijón/Xixón actúen nel ámbitu de la infancia y la familia cola finalidá de facilitar el bienestar y proteición de los y les menores del conceyu, amás de proporcionar apoyu a les families.
Talleres grupales gratuitos dirixíos a tolos pas, mas o tutores llegales. Son espacios nos que los pas y les mas pueden compartir esperiencies y aprendizaxes sobre la educación y crianza de los fíos y fíes. Alcuentra la to actividá.
Promoción de la salú nes biblioteques al traviés de talleres dirixíos a mas, pas y al públicu infantil y xuvenil nos que se busca promover el papel de la familia frente a les conductes de riesgu n'internet, dase importancia a los xuegos coopertativos y d'estratexa; amás de tratase la fición dixital y los videoxuegos.
Los Servicios Sociales necesiten la collaboración de tola sociedá pa identificar a los y les menores que pudieren tar nuna situación de riesgu, desatención, malos tratos o desamparu. Ensin collaboración de la sociedá los Servicios Sociales nun pueden entamar actuaciones dirixíes a la proteición d'esos neños, neñes y adolescentes.
Pa treslladar la información que-y faiga sospechar qu'un neñu, neña o adolescente pudiera tar nuna situación de riesgu o de desproteición, tien que dirixise al so Centru de Servicios Sociales de la zona, onde va atopar profesionales que van recoyer la notificación y van entamar actuaciones encaminaes a la proteición de los y les menores.
Pa notificar una situación de desproteición infantil nun ye necesario que tenga una certeza absoluta de que la situación ta produciéndose, sinón que val con anicios razonables d'ello, yá que la responsabilidá de determinar si se ta produciendo o non una situación de desproteición infantil correspuende a los Servicios Sociales. Van adoptase les midíes necesaries pa nun desvelar la identidá de la persona que punxera los fechos en conocimientu de los Servicios Sociales.
Les faltes d'asistencia a clase suponen un problema pal desarrollu de neños, neñes y adolescentes, yá qu'influyen negativamente nel rendimientu y los resultaos académicos, y faen más difícil consiguir una titulación, coles implicaciones qu'ello puede tener pal futuru. Dir a clase aporta la oportunidá de rellacionase y permite deprender a desenvolvese nun sitiu con normes, horarios y responsabilidaes. Por ello, la Fundación Municipal de Servicios Sociales coordina dende l'añu 2002 una llinia de trabayu interinstitucional énte l’absentismu escolar qu'articula les actuaciones de los centros educativos y de los Servicios Sociales Municipales.
Los Servicios Sociales Municipales, xunto con otros sectores y servicios de l'Alministración Pública, tienen llegalmente encomendada la función de prevenir les situaciones de desproteición infantil, apoyar a les families nel exerciciu positivu de la parentalidá, acordies coles necesidaes de neños, neñes y adolescentes y eliminar o disminuir los factores de riesgu qu'inciden na situación personal y social, amás de promover los factores de proteición del o de la menor y la familia.
Intervención con families
Los Equipos d'Intervención Téunica d'Apoyu a la Familia (EITAF) son equipos multidisciplinares que tienen como oxetivu xeneral la consecución d'un ambiente familiar positivu, acordies coles necesidaes de neños, neñes y adolescentes, eliminando o disminuyendo los factores de riesgu qu'inciden na so situación personal y social y promoviendo los factores de proteición del o de la menor y la familia. Los Equipos intervienen coles families derivaes dende les Unidaes de Trabayu Social, amás de dende'l sistema xudicial y dende l’Institutu Asturianu d'Atención Integral a la Infancia y a les Families.
Conseyu d'infancia y adolescencia
Un sitiu nel que les neñes, neños y adolescentes son escuchaos, espresen les opiniones y idees y treslladen les propuestes y demandes sobre les cuestiones y iniciatives que-yos afeuten direutamente. Col oxetivu d'analizar y aldericar sobre los temes que s'esparden, recoyendo les idees, suxerencies y inquietúes, pa treslladales a los y les representantes municipales de Gijón/Xixón. Compuestu por un máximu de 50 neños, neñes y adolescentes, con edaes comprendíes ente 8 y 17 años, previamente escoyíos y escoyíes nos conseyos de zona.
Plan d'infancia y adolescencia
En Gijón/Xixón realízase dende fai años un trabayu importante pa la proteición y promoción de la infancia y l'adolescencia col envís de garantizar los sos derechos y participación na sociedá, coordinar de forma efeutiva toes estes aiciones, acometer otres en función de les necesidaes, da-yos relevancia y visibilidá a toes elles y promover la participación de la infancia y adolescencia na vía pública. El nuestru conceyu consigui'l Sellu de reconocimientu del Programa de “Ciudades Amigas de la Infancia” d'Unicef nel añu 2016, asumiendo'l compromisu de trabayar pol cumplimientu de los derechos de la infancia.
El I Plan Integral d'Infancia y Adolescencia de Gijón/Xixón, desarrollóse ente'l 2015 y el 2017 y tres la so finalización ellaboróse'l II Plan Municipal de la Infancia y l'Adolescencia de Gijón/Xixón 2020-2024, tres les consultes a les organizaciones que trabayen cola infancia en Gijón/Xixón, a los centros educativos y a los servicios municipales implicaos. Esti II Plan contó cola participación activa del Conseyu Municipal d'Infancia y Adolescencia de Gijón/Xixón y la so división nos 4 Conceyos de Zona (zona Centro, zona Oeste, zona Sur y zona Este), sumando un total de 102 neños, neñes y adolescentes (58 neñes y 44 neños) que revisaron les medíes del I Plan Municipal d'infancia y Adolescencia y trabayaron con un documentu amigable. La información recoyida estructúrase en seis árees d'actuación (Deporte, Salú, Urbanismu y Mediu Ambiente, Educación y Families, Ociu, Tiempu Llibre y Cultura).
Pa la so coordinación y siguimientu cuéntase con una Comisión Téunica integrada por personal téunico municipal de tolos Servicios implicaos. En dicha comisión va participar tamién el personal dinamizador de los grupos y estructures locales de participación infantil.
Los oxetivos xenerales d'esti Plan son los siguientes:
- Garantizar el cumplimientu de los derechos de la infancia y adolescencia.
- Coordinar les actuaciones en materia d'infancia ente los diversos recursos municipales, entidaes y distintes organizaciones locales.
- Incorporar la participación infantil y adolescente na vida pública municipal.
- Detectar necesidaes non cubiertes y acometer actuaciones nueves.
- Impulsar de manera integral el desarrollu de Gijón/Xixón como “Ciudad Amiga de la Infancia”.
El II Plan Municipal de la Infancia y l'Adolescencia de Gijón/Xixón 2020-2024, aprobóse na Xunta de Gobiernu Local del Ayuntamientu de Gijón/Xixón y adoptóse por unanimidá en fecha 3 de payares de 2020. L'aprobación presentóse na sesión Plenaria del Ayuntamientu de Gijón/Xixón del 16 d'avientu de 2020.
Dichu Plan busca garantizar el cumplimientu de los derechos de la infancia y de l'adolescencia, amás de coordinar les actuaciones ente los diferentes departamentos municipales, detectar necesidaes y siguir col trabayu del conceyu de Gijón/Xixón como “Ciudad Amiga de la Infancia”, ente otros compromisos.
