Al traviés del audiovisual d’Elmo, del xuegu de los semáforos, y de la interacción con dellos personaxes infantiles de cuentu, les persones participantes na actividá descubren munches coses interesantes sobre la biblioteca.
Deprenden que fai falta tener la tarxeta ciudadana pa usar el serviciu d’empréstamu y disfrutar dafechu de les actividaes que más-yos presten, que lo qu’hai na biblioteca ye de toes y de toos y lo importante que ye cuidalo cuando lo llevamos pa casa, y que cuando la maxa permite que los personaxes escapen de los cuentos y cuerran gayoleros pela zona infantil, pueden ayudanos a devolvelos al so sitiu poniendo asina n’orde la biblioteca.
L’actividá tien como oxetivos identificar l’espaciu onde tán los llibros adecuaos a la edá de les y los escolares participantes, conocer les pautes adecuaes de comportamientu na biblioteca, distinguir los tipos de documentos qu’esisten nelles, averase a los conceutos bibliotecarios d’ordenación y clasificación, y descubrir el mundu de los cuentos al traviés de los sos personaxes.
La maxa de la biblioteca ye una actividá de formación nel usu de la biblioteca dirixida a grupos d’escolares de 1er cursu d’Educación Infantil de los centros educativos de Xixón.
El profesoráu puede contautar cola biblioteca más cercana al so centru educativu pa facer la solicitú al traviés d’esti trámite. Va facese una solicitú por cada actividá demandada y clase. El personal bibliotecariu va informar sobre qué actividaes ufierta cada biblioteca y va asignar les places n’estudiando la demanda.
