“Los oficios de…” ye un programa d’orientación vocacional del Departamentu de la Mocedá del conceyu de Gijón/Xixón, que busca da-y al alumnáu de 4º de la ESO y de 1u y 2u de Bachilleratu información sobre delles profesiones y oficios, n’especial sobre los qu’hai posibilidá de formase en Gijón/Xixón o n’Asturies.
Con esti programa d’orientación vocacional, que venimos desarrollando dende l’añu 2015, persíguense, ente otros, los oxetivos siguientes:
- Favorecer los procesos de maduración vocacional y profesional.
- Orientar y informar al alumnáu sobre los aspeutos que componen cada profesión, facilitándo-yos la toma de decisiones venceyaes al so futuru académicu y profesional d’un mou práuticu y participativu.
- Propiciar un espaciu d’alcuentru qu’amuese un perfil profesional p’ampliar el conocimientu de les opciones formatives y profesionales.
- Proporcionar información sobre tolos estudios venceyaos a la temática, cola fin de facilitar la toma de decisiones de la mocedá.
El programa compónse de dos aiciones diferenciaes y complementaries, pa que l’alumnáu puea trabayar primero nel aula dellos conteníos sobre los que se va afondar nos alcuentros con profesionales de cada ámbitu:
- Edición de materiales informativos como soporte mesmo pal trabayu nel aula que pa les sesiones de divulgación. Pa cada oficiu hai un folletu esplicativu qu’ofrez información sobre los estudios universitarios, de formación profesional y certificaos de profesionalidá venceyaos a esa profesión y sobre delles cuestiones rellacionaes cola temática (historia, salíes profesionales, datos d’interés…)
- Alcuentros con profesionales de los diferentes oficios, que puean dar una visión práutica de la so formación, del so desarrollu profesional y de les salíes profesionales que puen tener los estudios.
Ye mui recomendable trabayar enantes nel aula col folletu de l’actividá, bien al traviés de les tutoríes o nes clases de les materies que se consideren convenientes. D’esti mou, l’alumnáu va poder tener un conocimientu sobre’l tema a tratar nel alcuentru colos profesionales. Los folletos de los oficios tán disponibles pa la so descarga na fueya de cada actividá, y van facilitase tamién exemplares en papel a los centros, al traviés de los y les orientadores de cada centru.
Anguaño ufiértense cuatro actividaes distintes, venceyaes a profesiones de les qu’esisten estudios n’Asturies, de mou que l’alumnáu con interés en dalguna d’elles puea conocer les opciones que tien pa cursar estudios rellacionaos y les posibles salíes llaborales que tien. Profesionales de caún de los ámbitos van amosar a los mozos y les moces participantes cómo puede facese la llegada al mercáu de trabayu nuna profesión determinada al traviés de trayeutories mui distintes, en sesiones que resulten mui arriquecedores pal alumnáu.
Los Oficios del cine fáise tolos años cola collaboración del Festival Internacional de Cine de Gijón/Xixón, aprovechando la presencia na nuestra ciudá de profesionales del mundu del cine que puen tresmitir al alumnáu información sobre’l so trabayu.
Los oficios del deporte y el tiempu llibre
Nesta actividá, de la mano de profesionales que desarrollaren la so carrera profesional deportiva a nivel nacional y hasta internacional y con una formación específica nel ámbitu deportivu, les y los estudiantes van descubrir que’l deporte pue ser más qu’una profesión.
Los oficios de les matemátiques
Profesionales de dellos campos van averar a les y los estudiantes a les distintes profesiones venceyaes a les matemátiques y la infinidá d’aplicaciones que puen tener en munchos ámbitos de la nuestra vida. Como van poder ver, les matemátiques tán en toes partes.
Los oficios del mediu ambiente
Los distintos profesionales colos que contamos cada añu nesti alcuentru van presentar al alumnáu dellos trabayos que tán venceyaos col mediu ambiente y que-yos van permitir ampliar les sos posibilidaes d’eleición a la hora d’escoyer estudios.
Programar en un lenguaje específico, programar entornos concretos, hacer uso del Big Data, videojuegos, para la web, dispositivos móviles y mucho más. Con todos estos conceptos en mente, te hablaremos sobre estudios y profesiones que tienen relación con la Informática y que pueden brindarte muchísimas oportunidades a nivel profesional.
La inscripción nos alcuentros con profesionales fáenla los centros educativos que vayan participar col alumnáu de 4º d’ESO y 1u o 2u de Bachilleratu. Anque al principiu del cursu tovía nun se conocen les feches de realización exautes, na ficha de cada actividá indícase un rangu de feches orientativu. Pa solicitar más información puen contautar cola Oficina de la Mocedá.
Los centros interesaos en participar inscríbense nel mes de setiembre, al principiu de cada cursu, cola tarxeta ciudadana del centru educativu col códigu y clave. Al traviés de la inscripción a l’actividá, el centru educativu manifiesta’l so interés en participar, pa que depués nos pongamos en contautu colos centros interesaos pa informar de tolos detalles (fecha y hora, sitiu, desplazamientu del alumnáu…)
