ENTRADA GRATUITA normes d'accesu (pdf en castellanu) ficha d'accesibilidá
De 09:30h a 18:30 h de martes a vienres.
De 10:00h a 18:30 h sábados, domingos y festivos.
D'abril a setiembre:
De 10:00h a 19:00 h de martes a viernes.
De 10:30h a 19:00 h sábados, domingos y festivos.
Peslláu:
Tolos llunes del añu.
1 y 6 de xineru, martes d'antroxu, 15 d'agostu, 24, 25 y 31 d'avientu.
Xixón
El Muséu del Ferrocarril d’Asturies abrió les puertes en 1998 y anguaño tien una de les coleiciones ferroviaries más importantes d’España. Ta dedicáu a la conservación, investigación y espardimientu de la historia industrial d’Asturies, que tien como elementu vertebrador el ferrocarril. El muséu coneuta la historia nacida cola Revolución Industrial col presente y actúa asina como un importante elementu dinamizador de la cultura local y asturiana. El Muséu del Ferrocarril d’Asturies ta declaráu muséu d’ámbitu de la comunidá autónoma d’Asturies y, xunto cola Ciudadela de Celestino Solar, forma parte del área de Museos Industriales de la Fundación Municipal de Cultura, Educación y Universidá Popular de Xixón.
El muséu organiza esposiciones temporales dedicaes a los ferrocarriles y el patrimoniu industrial y a otros temes que complementen los conteníos de la esposición permanente. Amás, tien un centru de documentación qu’axunta un conxuntu mui valoratible de testimonios gráficos y documentales, fundamental pal conocimientu de la historia industrial y el mundu del ferrocarril. Los conteníos estructúrense nuna serie d’unidaes temátiques qu’amuesen la historia social, económica, teunolóxica y industrial venceyada al mundu del ferrocarril n’Asturies, que tuvo una de les redes más importantes d’España.
El Muséu asítiase nel entamu del históricu barriu obreru d’El Natahoyo, que tien l’orixe al final del sieglu XIX y que tuvo muncho que ver cola edificación en 1874 de la terminal del Ferrocarril del Noroeste, actual edificiu principal del Muséu. El total d’espaciu dedicáu al Muséu inclúi tres edificios y una playa amplia de víes, con un total de más de 14 000 metros cuadraos. D’ellos, 10 000 integren la esposición permanente y, nel restu, tán la zona alministrativa, el centru de documentación, la sala d’esposiciones temporales, la sala d’actividaes, el taller de restauración, el de reserva y dellos espacios verdes.
La estación antigua, que se correspuende col modelu de primer categoría de la Compañía, respuende al proyeutu del inxenieru Melitón Martín. Nel so andén históricu muéstrase una parte bultable del material móvil. Nesti inmueble sitúense les sales d’esposiciones temporales, qu’ocupen antigües dependencies de la estación. Nel pisu superior, na zona d’oficines y vivienda del xefe de la estación d’antaño, tán la biblioteca, el centru de documentación y los servicios alministrativos.
En 1990, la estación cesó’l so usu como terminal ferroviaria y pasó a ser muséu. Por cuenta d’ello, diseñóse un edificiu, paralelu al que yá esistía y xuníu a él per una marquesina. Respuende al proyeutu de los arquiteutos Hernández Sande y abelluga les sales d’esposición permanente y el salón d’actos. Completen les instalaciones un edificiu polivalente, destináu a esposiciones, taller de restauración y almacenes, los andenes y la playa antigua de víes de la estación, onde hai más elementos de material móvil, incluyendo los que permanecen n’estáu operativu.
La coleición espuesta organízase en delles unidaes temátiques que conformen un paisaxe al traviés del que los y les visitantes puede construyir el so itinerariu propiu. Los conteníos repártense ente l’edificiu de la estación vieya y los andendes, el de la esposición permanente, la playa de víes y la nave polivalente.
La coleición de muséu ta formada por más de dos mil pieces, y d’elles, más d’un centenar son material móvil, ye dicir, locomotores, vagones y coches d’hasta siete anchos de vía distintos. Constitúin el mayor conxuntu de material históricu ferroviariu preserváu de toa España. Amás, conserváronse toa mena d’oxetos rellacionaos col llabor ferroviariu, como faroles, ferramientes o teléfonos. Ente’l conxuntu variáu de pieces que custodia’l muséu, cedíes na so mayoría per empreses y entidaes públiques collaboradores, destaquen les locomotores de vapor y les rellacionaes colos ferrocarriles mineros y industriales, dada la vinculación intensiva de la economía asturiana con estos sectores.
La política de creación de la coleición del muséu básase na incorporación d’aquellos oxetos, materiales documentales y semeyes de mayor valor históricu, representativu y espositivu de cara a los oxetivos de difusión del centru. Asina, púnxose especial procuru en centrar la seleición n’aquelles pieces que permiten conservar la memoria del ferrocarril asturianu y nes que faciliten la difusión del significáu d’esti mediu de tresporte nel contestu históricu, económicu y social nel que se desarrolló. Por qué se creó’l ferrocarril, por qué s’implantó n’Asturies, qué significó pal desarrollu del so territoriu, quiénes y cómo utilizaron el ferrocarril son dalgunes de les entrugues a les que se respuende nel muséu. Puede vese una seleición de pieces na Rede Dixital de Coleiciones de Muséu d'España.
Fondu museográficu
Ta formáu por más de 3000 pieces. D’elles, más d'un centenar son material móvil, ye dicir, locomotores y vagones, de hasta siete anchos de vía distintos, que constitúin el conxuntu mayor de material históricu ferroviariu preserváu de toa España. Amás conserváronse tou tipu d’oxetos rellacionaos col llabor ferroviariu, como faroles, ferramientes, aceiteres y teléfonos. De tol conxuntu d’oxetos que custodia’l muséu, destaquen los rellacionaos colos ferrocarriles mineros y industriales pol venceyu intensu de la economía asturiana con estos sectores, y n’especial les locomotores de vapor.
Fondu documental
El Muséu del Ferrocarril d’Asturies custodia un fondu documental importante formáu a lo llargo los años por cesión, donación y adquisición. Constitúi un testimoniu de valir incalculable pal estudiu, conservación y espardimientu del patrimoniu y de la historia ferroviaria d’Asturies, sicasí el fondu del muséu abarca otres temátiques d’interés non esclusivamente ferroviariu y conforma un patrimoniu documental de dellos formatos y soportes organizaos nes seiciones correspondientes pa facilitar asina l’accesu a les y los investigadores y usuarios. El fondu tien archivu, biblioteca, hemeroteca y fototeca.
El Muséu desarrolla un programa ampliu d’actividaes dirixíu a tolos públicos que se renueva añalmente y nel que s’inclúin visites y itinerarios guiaos pa grupos, conferencies, cursos singulares, presentaciones de llibros, actividaes de vacaciones, talleres pa escolinos/es, actividaes pa públicu adultu o pa coleutivos desfavorecíos y munches otres actividaes.
Xornaes del Vapor: nestes xornaes pónense en marcha locomotores históriques de vapor y diésel. Los y les visitantes pueden desplazase en viaxes pequeños pel muséu nos trenes y en coches antiguos de madera y facer visites guiaes.
Mercadín Ferroviariu: los andenes del Muséu abelluguen el mercadín ferroviariu navidiegu tradicional, organizáu pola Asociación d’Amigos del Ferrocarril de Xixón “Don Pelayo”.
Conferencies: el Muséu organiza un ciclu añal de conferencies sobre temes rellacionaos col patrimoniu que custodia y colos proyeutos d’investigación que desarrolla. Celébrense xeneralmente el tercer xueves de cada mes, sacante agostu, nel salón d’actos.
Esposiciones temporales: referíes al ferrocarril, el patrimoniu industrial y otros temes que complementen los conteníos de la esposición permanente.
Biblioteca y centru de documentación
Mesmo la biblioteca que la hemeroteca histórica y el centru de documentación tán dirixíos a toles persones que precisen de la consulta de material pa investigación y estudiu. L’accesu ye gratuitu y hai qu’acutar primero.
Col envís de difunfir los sos servicios y instalaciones y pa fomentar l’estudiu y la investigación de tema ferroviariu, el Muséu del Ferrocarril d’Asturies espublizó o patrocinó delles publicaciones.