La Oficina de Normalización Llingüística de Xixón, dientro del so llabor de dinamización llingüística, entama campañes de sensibilización que favorezan la participación consciente de la ciudadanía de Xixón nel procesu de normalización llingüística, y asina promocionar l'emplegu de la llingua asturiana y garantizar los nuestros derechos llingüísticos.
Para recordar la figura de Don Federico González-Fierro Botas, y el ciñu que tenía a la nuestra llingua, y la so normalización social, modificóse'l Premiu d'Ensayu y Trabayos d'Investigación “Fierro Botas”; convocando asina'l Premiu Fierro Botas a la Meyor Idea Normalizadora, empobináu al alumnáu de Llingua Asturiana de Secundaria y Bachilleratu de Xixón y de toa Asturies, col envís de favorecer el so protagonismu y la so reflexón y implicación nel procesu de normalización llingüística.
Esti premiu va concedese al centru educativu que proponga y plantegue’l meyor proyeutu, novedosu y orixinal, que ponga en valir l’asturianu y favoreza’l so usu y la so visibilidá nel nuestru conceyu.
Tien l’envís de favorecer el protagonismu activu del alumnáu y la so reflexón ya implicación nel procesu de normalización llingüística. Trátase d’agasayar y recordar la figura de Federico Fierro Botas al empar que la venceyamos cola mocedá a lo que tanto quixo y colo que se rellacionó de siguío nos sos años como enseñante.