Esti ye un concursu pa conocer meyor la historia, los secretos y los personaxes de Xixón. Nél, puede participar tol alumnáu de 6u de Primaria matriculáu en Llingua Asturiana de cualesquier colexu de Xixón. El concursu suel entamar n'ochobre y rematar en mayu y desarróllase asina: nos meses d’ochobre, xineru y abril, propónse a les escueles participantes una entruga sobre dellos temes, que van precisar un pequeñu procesu d’investigación per parte del alumnáu.
L’oxetivu ye que cada escuela dea rempuesta al mayor númberu d’entrugues pa dir sumando puntos.
Les entrugues mándense per corréu a los colexos participantes al tiempu que s’espublicen nes redes sociales de la Oficina de Normalización Llingüística. Los/es participantes pueden pegales nel panel de la llingua que va tener caún de los centros que participen. Les rempuestes correutes valórense de 0 a 3, en función de los conteníos:
a. La ortografía (va valorase la correición llingüística, si nun hai nada escrito tendrán 0 puntos nesi apartáu).
b. La orixinalidá.
c. El conteníu, que seya un trabayu completu con daqué escrito y visual (dibuxos, semeyes, información, maquetes, figures, trabayos na rede...).
d. El trabayu a comuña.
e. La presentación.
L’alumnáu tien de plazu pa unviar les rempuestes (pente medies del profesoráu de llingua asturiana) a la Oficina de Normalización Llingüística de Xixón, les selmanes que medien ente la publicación d’una entruga y la siguiente, habiendo una fecha tope pa entregales. La Oficina va contabilizando les puntuaciones de les escueles que participen y la clasificación provisional colos puntos algamaos por cada escuela, que van unviase al tiempu que salen les entrugues nueves. Nun cuenten les rempuestes, que, siendo correutes, nun tean escrites n’asturianu.
La Oficina de Normalización Llingüística de Xixón va declarar ganadora a la escuela que más puntos algame, siendo perimportante la trayeutoria durante tol concursu, valorándose enforma la regularidá na calidá de los trabayos presentaos. El premiu consiste nun lote de llibros pa la biblioteca del centru y una actuación teatral o musical n’asturianu na gala d’entrega de los premios pa los colexos finalistes.
Los trabayos presentaos nun han tener munchu llargor magar que se puen axuntar maquetes, semeyes, dibuxos o otres manualidaes feches en comuña. Cuando remate’l concursu, los trabayos van poder recoyese na Oficina de Normalización Llingüística y los que nun se recueyan enantes de finales del mes de xunu, van destruyise.