Una parte básica del trabayu pola dignificación social del asturianu pasa por averalu a les distintes estayes de la sociedá, por usalu con normalidá en tolos ámbitos: anguaño vivimos arrodiaes y arrodiaos de pantalles; la pandemia obligónos a decatanos de que podemos facer una montonera de coses con un ordenador, una tableta o un teléfonu móvil (mercar, teletrabayar, consumir productos culturales, facer trámites coles alministraciones, tar al día de lo qu’asocede nel mundu o tener más cerca a les persones que queremos, por poner dalgunos exemplos).
Pa la xente más mozo, lo dixital ye dalgo colo que trabayen davezu. Sicasí, seguramente nun conozan cómo entamó, pali pali, a usase l’asturianu nos distintos programes informáticos o cuáles foron les primeres páxines web nel nuestru idioma.
Vamos trabayar col pallabreru de la informática, #Restol@ndoPelaRede (asoleyáu en 2021), qu’inclúi una guía d’aplicaciones y programes n’asturianu con una esplicación cenciella de caúna.