Francisco Fresno, 2000. Fierro, aceru cortén y aceru inoxidable.
Proyeuta una solombra allargada, que ye parte de sí mesma. Les sos dimensiones contrasten cola rodiada: prisma de 16 metros d’altura, de fierro y aceru, sobre’l que s’adosen mil relieves xeométricos pequeños d’aceru inoxidable y delles formes. Torre como un faru interior o como una chimenea, hermana de les munches que poblaron el paisaxe industrial y que’l sieglu s’encargó de dinamitar. Los relieves sobre la superficie dibuxen ensin querer señes y rostros, mapes de mundos inesploraos, mensaxes que los dioses de la memoria intenten evitar qu’escaezamos. Torre que ye, amás, símbolu de la industrialización xixonesa y recuerdu de la fábrica vieya que funcionó a lo llargo de tantu tiempu nos terrenos onde güei s’asitia’l parque.
Xixón
