Na Oficina de Mocedá queremos, amás de date información básica sobre tolos temes que te puean interesar (actividaes d’ociu y tiempu llibre, beques, ufiertes de trabayu…), facilitate l’accesu a información especializada, contrastada y de calidá sobre temes concretos que munches veces s’escapen de les posibilidaes d’una primer consulta y precisen l’atención de profesionales especializaos.
Por esi motivu, tenemos, ente otros servicios, una Asesoría Xurídica qu’atienden dos abogaes que t’ofrecen asesoramientu gratuitu, amás de trabayar tamién pa otres árees, como formación pa centros educativos o edición de publicaciones.
L’Asesoría Xurídica de la Oficina de la Mocedá de Gijón/Xixón ofrez asesoramientu personalizáu, confidencial y gratuitu sobre cualesquier tema del ámbitu xurídicu sobre’l que tengas duldes: asociacionismu, derechos de la mocedá, reclamaciones de consumu, arriendu y compra de vivienda, contratos de trabayu, etc… Esti serviciu empobínase sobre too a persones d’hasta 35 años, mesmo qu’a madres, padres y educadores.
La nuestra Asesoría Xurídica atiéndete pel branu los llunes n’horariu de mañana. Calcando en "Solicitar cita" vas poder ver les cites disponibles pa los díes siguientes. Nel apartáu “información adicional” de la cita ye imprescindible qu’apurras una descripción curtia del motivu de la consulta, pa que les abogaes responsables del serviciu puean date la meyor atención. La información que facilites ye confidencial dafechu. Si tienes dalguna dulda pues ponete en contautu cola Oficina de Mocedá de Gijón/Xixón pa que podamos ayudate.
L’Asesoría Xurídica ofrez dellos talleres pa centros educativos. Nesi cursu ponen talleres sobre “Jóvenes y empleo”, “¡Que no te engañen! Cómo comprar online de un modo seguro” y “Gestionando lo que comparto en la red”.
El derechu a l'asistencia sanitaria n'España
Nos últimos años asistimos a dellos cambios llexislativos qu’afeuten al derechu de recibir asistencia sanitaria nel Sistema Nacional de Salú y a los medicamentos incluyíos na prestación de farmacia. Esta guía intenta desplicar d’un mou cenciellu cuálos son los derechos básicos de la mocedá no que cinca a esti tema.
Derechos y deberes énte la xusticia
Na presente guía vamos intentar desplicar dalgunos aspeutos llegales d’interés pa tola ciudadanía y, n’especial pa la mocedá, en rellación col exerciciu de dellos derechos fundamentales, pero tamién col cumplimientu de deberes básicos rellacionaos cola seguridá y la convivencia.
Derechos de la xuventú n'Europa
Nel añu 2013 cellebróse l’Añu Européu de los Ciudadanos, motivu pol que s’editó esti dosier pa esparder los derechos que nos da la condición de ciudadanu o ciudadana de la Unión Europea: qué hai que tener en cuenta pa viaxar, derechos de les y los trabayadores na UE, trámites pa estudiantes d’otros países…
La juventú y la propiedá intelectual
Nesta publicación vas atopar información sobre los derechos d’autoría y propiedá intelectual (qué son y cómo se protexen), les entidaes de xestión coleutiva de derechos de propiedá intelectual, l’intercambiu de ficheros P2P, el dominiu públicu, les llicencies Creative Commons y muncho más…
