El programa d’Animación considera la llectura como ferramienta básica pal exerciciu del derechu a la educación y a la cultura, nel marcu de la sociedá de la información y l’interés xeneral de la llectura na vida cotidiana al traviés del fomentu del vezu llector.
La llectura permite’l desarrollu de la personalidá y fomenta la socialización, ye dicir, ye un elementu pa la capacitación y la convivencia, pa desarrollase na sociedá de la información. Lleer ye escoyer perspeutives dende les qu’asitiar les nuestres miraes invitando a reflexonar, pensar y crear.
La Rede Municipal de Biblioteques de Gijón/Xixón desarrolla una de les sos principales llinies de trabayu al rodiu la llectura. El Programa d’Animación engloba un conxuntu d’actividaes, estratexes y téuniques que tienden a favorecer, a potenciar y estimular l’averamientu de les y los usuarios a los llibros, a meyorar los hábitos llectores, a asegurar el so crecimientu llector y a fomentar l’aspeutu lúdicu de la llectura. Esti programa abarca un númberu ampliu d’aiciones.
Vas poder atopar delles actividaes pensaes pa distintos grupos d’edá, infantiles, pa la mocedá o p’adultos, incluso otres de participación en familia.
La llectura a los primeros años d’edá ye fundamental pa crear l’hábitu llector y estimular la imaxinación, la creatividá y l’actu reflesivu. Bebecuentos, cuentacuentos, club de llectura infantil, teatru infantil.
Les moces y mozos van poder atopar actividaes d’animación a la llectura acordies a les sos realidaes nueves. Compartir esperiencies y estimular llectures nueves, supón fomentar sensaciones n’edaes onde’l vínculu col otru ta mui afianzáu. Club de llectura xuvenil, lleer la ciencia / la filosofía…
Actividaes destinaes a mayores d’edá ensin más límite que la participación y compartir esperiencies alquiríes en beneficiu de los demás. Club de llectura d’adultos, Taller de creación lliteraria, Alcuentros con autores…
Compartir la llectura ente pás y mas colos fíos y fíes supón ún de los instantes más íntimos na rellación familiar. Retos de llectura.
Dende cada actividá vas poder atopar el trámite ónde apuntate. Nun escaezas que la mayoría de les actividaes tienen númberu limitáu de participantes per orde d’inscripción ¡Apúntate y esfrútales!
Vas poder atopar una variedá grande de guíes de llectura ellaboraes dende les nuestres biblioteques onde te proponemos llectures que pueden complementar l’actividá na que quieras participar.
