Con 6 años les y los escolares yá saben lleer, o casi. Por eso nesta actividá queremos fala-yos de los llibros, dixitales y en papel, de cómo se llama caúna de les sos partes, de quién los crea y fai posible que lleguen a les nuestres manes. Nella tamién abordamos la so organización na biblioteca, la clasificación, el ‘teyuelu’... Too ello de forma prestosa y al traviés de xuegos nos que retamos al alumnáu a convertise en bibliotecaries y bibliotecarios per un día. Y, como non too va ser conocimientu, rematamos con un xuegu de memoria sobre cuentos clásicos, col que vamos trabayar tamién l’espíritu deportivu.
Cada oveya cola pareya ye una actividá de formación nel usu de la biblioteca dirixida a grupos d’escolares de 1er cursu d’Educación Primaria de los centros educativos de Xixón.
El profesoráu puede contautar cola biblioteca más cercana al so centru educativu pa facer les sos solicitúes al traviés d’esti trámite. Va rellenase una solicitú por cada actividá que se solicite y clase. El personal de la biblioteca va informar sobre qué actividaes ufierta cada biblioteca y va asignar les places n’estudiando la demanda.
