L’oxetivu de la rede de tresferencia CARD4ALL ye esplorar funcionalidaes nueves venceyaes al usu de la Tarxeta Ciudadana en distintos contestos y desarrollar una fueya de ruta común pa ciudaes que quieran implementar una solución asemeyada o meyorar los servicios ofrecíos basándose nun enfoque d’aprendizaxe mutuu.
El Conceyu de Gijón/Xixón llidera la rede de tresferencia URBACT CARD4ALL col proyeutu de Tarxeta Ciudadana que foi seleccionada como bona práutica europea nel añu 2017.
La rede de tresferencia URBACT CARD4ALL ta enfocada a la implementación de servicios y teunoloxíes innovadores pente medies d’un Sistema de Tarxeta Ciudadana que permite a les ciudaes atropar información pa meyorar los sos servicios y procesos participativos.
Al mesmu tiempu, con esta ferramienta pueden desarrollase midíes rellacionaes cola inclusión social, col comerciu local, cola movilidá urbana y cola sostenibilidá, por citar dalgunos exemplos. Participen como ciudaes socies: Aveiro en Portugal, Jurmala en Letonia, Suceava en Rumania, Clermont-Ferrand en Francia y Sassari en Italia.
El presupuestu del proyeutu ye de 583.382,41 €, correspondiendo a Gijón/Xixón 138.735,42 € cofinanciaos al 70 %.
La Tarxeta Ciudadana de Gijón/Xixón trabaya con una teunoloxía flexible que puede usase de distintes maneres y pa distintos fines, por ello xunto col espertu y les ciudaes de tresferencia, gustaríanos evaluar los servicios actuales y identificar nuevos amás d’anticipanos al impactu de los retos teunolóxicos de futuru.
Les ciudaes participantes tienen distintos niveles de desarrollu de les sos tarxetes ciudadanes (dende un proyeutu hasta exemplos de cooperación público-privada) polo que la participación nel proyeutu ye una bona oportunidá pa esplorar les diferentes funcionalidaes y adaptales a les sos necesidaes y contestos.
Como cada modelu de Tarxeta Ciudadana ye distintu y dalgunos servicios son complementarios, podemos beneficianos de les esperiencies de caún y deprender de los sos procesos d’implementación y tamién de los sos fallos. El proyeutu tien una duración de 2 años y mediu y remata en xunu del 2021.
