L’oxetivu principal d’esta actividá ye que l’alumnáu conoza de primer mano esti deporte, iniciándolos nesta esperiencia con material soft adautáu a los centros escolares y que depués lo puean prauticar nun campu de golf, nunes instalaciones curioses, cola familia y les amistaes, nun entornu natural incomparable.
Ún de los oxetivos últimos ye tamién que’l golf s’introduza nos colexos como un deporte más, dientro de l’asignatura d’educación física, como yá pasa n’otros países y en dalgunes comunidaes del Estáu.
El golf ye una escuela de vida escelente.
L’ACTIVIDÁ YE GRATUITA DAFECHU
L’actividá ta empobinada sobre manera a alumnáu a partir de 3u d’educación primaria y va desarrollase peles mañanes, n’horariu escolar. El númberu d’alumnos/es de cada unidá deportiva va ser el correspondiente a una clase completa, alredor de 25 alumnos/es. Compónse de 6 sesiones.
Cinco sesiones nel ximnasiu o patiu cubiertu, caúna d’una hora de duración. Va apurrise al centru demientres el tiempu que dure l’actividá, tol material téunicu deportivu necesariu pa la execución con seguranza de los golpes, mesmo qu’una unidá didáutica pa l’alumnáu, colos fundamentos básicos d’esti deporte.
Una sesión teórico-práutica de dos hores nel Campu Municipal de Golf La Llorea, onde se van prauticar los conocimientos que se consiguieron nel centru, utilizando pa ello mesmo’l campu práutiques, que los putting green qu’hai.
Enantes del comienzu de l’actividá el profesoráu d’educación física van poder recibir nel campu de golf unes clases gratuites que-yos van permitir iniciar a les alumnes y alumnos nesti deporte y utilizar el material soft disponible. L’alumnáu interesáu y qu’amuese interés en siguir deprendiendo (50 como máximu per centru escolar), va poder disfrutar d’un cursu d’iniciación gratuitu nel campu de golf, que subvenciona la Real Federación Española de Golf.
Pa rematar, queremos que los colexos que formen parte d’esti programa, puean competir colos sos equipos propios de golf. Pa ellos la RFEG creó la Lliga Escolar de Golf. Mozos y moces de toa España compiten nesta lilga defendiendo los colores de los sos colexos. Esta lliga cellébrase cada añu y tien la so web propia.
El profesoráu tien que tar presente mientres se desarrolle l’actividá nel centru, apoyando a les y los profesores de golf cuando estos lo necesiten. El profesoráu va tener qu’acompañar a les alumnes y alumnos nos trayeutos hasta’l campu degolf y la vuelta al centru, faciéndose responsables del so comportamientu nel campu golf.
A lo llargo del añu puede haber distintes ediciones y periodos d’inscripción, siendo’l periodu d’inscripción habitual al principiu de cada cursu escolar. Consulta los plazos d’inscripción destacaos, o accede a la plataforma d’inscripciones pa ver el detalle de les inscripciones disponibles.
