Medicina, química, bioloxía, música, psicoloxía, robótica, economía, videoxuegos, medicina, inxeniería, informática, astroloxía…. “Nin tán toles que son, nin son toles que van tar…”
Les matemátiques son la ciencia más astrauta y la que más veces tuvo qu’aguantar la pregunta: ¿Pa qué sirven? Les ciencies matemátiques son, bien de veces, les grandes incomprendíes porque, a priori, nun ye tan evidente la so utilidá na vida diaria. Pero, a la contra de lo que podíemos pensar, les matemátiques tán en tolos sitios.
Profesionales de distintos campos van averar a les y los estudiantes a les diferentes profesiones venceyaes a les matemátiques y la infinidá d’aplicaciones que pueden tener en munchos ámbitos de la nuestra vida, toos ellos/as guiaos pola Sociedá Asturiana d’Educación Matemática “Agustín de Pedrayes” que collabora nesta actividá col envís de mostrar qu’en realidá cuantos más conocimientos de matemátiques se tienen, meyores condiciones se dan p’aplicar la lóxica na toma de decisiones.
L’alcuentru con profesionales de "Los oficios de les matemátiques" suel facese la última selmana de mayu.
Esti folletu va permitite conocer qué estudios venceyaos a les matemátiques puedes cursar n’Asturies, tanto a nivel universitariu como en formación profesional, y cuáles pueden ser les sos salíes profesionales. Amás, ¡has ponete a prueba!: ¿cuánto sabes sobre matemátiques? Retámoste a descubrilo, y a deprender coses nueves que nun sabíes hasta agora.
