Los Oficios del cine faense tolos años cola collaboración del Festival Internacional de Cine de Gijón/Xixón. Aprovechando la presencia de diferentes profesionales del mundu del cine, que participen nesti eventu tan importante, tienen llugar estos alcuentros con moces y mozos estudiantes, pa conta-yos dalgunes de les profesiones que s’escuenden detrás d’una producción cinematográfica: direutores, productores, guionistes, montadores, téuniques y téunicos d’iluminación y soníu… van contar les sos esperiencies con un enfoque práuticu, orientáu al desarrollu de los estudios y carreres profesionales nel ámbitu del mundu audiovisual.
Nestos alcuentros cuentase amás cola presencia de dalgún/a de les y los componentes del equipu direutivu del CIFP CISLAN (Centru Integráu de Formación Profesional pa la Comunicación, Imaxe y Soníu de Llangréu) como centru de referencia n’Asturies nel ámbitu de la familia profesional de “Comunicación, Imaxe y Soníu” que van amosar a les y los estudiantes les distintes formaciones qu’imparten, venceyaes col mundu audiovisual.
L’alcuentru con profesionales de "Los oficios del cine" coincide tolos años cola cellebración del Festival Internacional de Cine de Gijón/Xixón (segunda quincena de payares).
Esti folletu ofrezte una panorámica de les distites profesiones venceyaes al mundu del cine y la TV. Vas poder conocer qué profesionales trabayen nuna producción de cine, y tamién descubrir qué estudios d’imaxe y soníu pueden abrite les puertes pa trabayar nel cine, la TV, la publicidá, etc.
