Actividá destinada a centros educativos (de mou prioritariu): alumnáu d’ESO / Bachilleratu / Formación profesional / E2O.
La esposición, que va acompañada de bien de material didáuticu, ye una propuesta pedagóxica novedosa, que trata con muncha amplitú y fondura un tema especialmente sensible pa les sociedaes contemporánees como ye’l respetu a la diferencia y los valores de tolerancia y solidaridá, al tiempu que plantega la necesidá de mantener siempre viva la memoria histórica.
La esposición preséntanos un percorríu qu’empieza na Alemaña anterior a la Segunda Guerra Mundial plantegando l’orixe del nazismu y les razones que llevaron a Hitler al poder.
D’esta manera, analícense con detalle les consecuencies que tuvo’l réxime nazi pa los y les xudíos/es, amás de la creación de los campos d’esterminiu, el papel de los y les españoles internaos nellos, la necesidá de la memoria y la pregunta de si esi fechu puede volver a repetise.
L’oxetivu ye facilitar al alumnáu de la nuestra rexón una información asequible a nivel formal (formatu d’esposición con equilibriu ente testos y imáxenes), que nun refugue la dureza de lo qu’asocedió (evitando caer na pedagoxía del horror), que faiga entender el procesu históricu y les sos circunstancies (pente medies de documentos xurídicos y historiográficos breves) y que mueva a la reflexón sobre la brutalidá absoluta del sufrimientu causáu (al traviés de los munchos testimonios de les víctimes y les fotografíes), cola intención de tar sollertes nel presente pa que nun se repita nada asemeyao. Con esti enfoque yá s’entiende que nun s’orienta a una conmemoración puntual sinón que quier perdurar y ser motivu de reflexón permanente.
Tolos años, el 27 de xineru, día de la lliberación d’Auschwitz, celébrase’l Día Internacional de les Víctimes del Holocaustu.
Col oxetivu d’una meyor esplotación didáutica de los materiales, vamos contar cola collaboración de los sos autores, el Grupu Eleuterio Quintanilla.
- Esposición (Versión en castellano y en euskera) (archivu comprimíu .zip)
- Propuesta d'actividaes pal alumnáun (archivu comprimíu .zip)
- Propuesta reducida d'actividaes pal alumnáu (archivu .doc)
- Más recursos (Recursos pal profesoráu; Debate; Esperiencies).
- Más información sobre'l Grupo Eleuterio Quintanilla.
Fórmenla 17 paneles de 2m. d’altu por 1m. d’anchu. Cada panel ye autoenrollable (tipu rollup o roller). El so tresláu puede facese en dos caxes de madera o bien cada roller por separáu pa más comodidá yá que caún tien la so funda de tela propia.
Dimensiones de cada caxa
- Altu: 110 cm.
- Llargu: 64 cm.
- Anchu: 32 cm.
- Pesu aprox.: 40 kg (cada roller pesa unos 4 kg. aproximao, incluyida la funda).
Condiciones de solicitú
Preciu: Gratuita.
Duración del empréstamu: con calter xeneral hasta 4 selmanes.
Llugar: Centros educativos o Centros Municipales. Espaciu ideal: vestíbulu o pasiyu con un mínimu de 18 metros lliniales de paré.
Caracuterístiques téuniques: 17 paneles (de 1 x 1,80m).
Tresporte: Cuerre al cargu del centru o entidá solicitante.
El centru comprométese a la vixilancia y mantenimientu en perfeutu estáu de la esposición y a asumir los gastos que pudieran producise pol so deterioru.
Centros educativos de Xixón: al traviés de la páxina web d'inscripción nes actividaes pa entidaes del Conceyu de Xixón.
Solicitú pa otres entidaes de Gijón/Xixón y centros educativos y entidaes non pertenecientes al conceyu: información y reserves al traviés del corréu electrónicu educacion.fmc@gijon.es.
ACTIVIDÁ ORGANIZADA POLA FMCE y UP Y EL GRUPO ELEUTERIO QUINTANILLA
