La seguridá y la cenciellez mueven esti proyeutu européu que xune 16 entidaes de nueve países distintos col envís de facilitar los trámites online nos servicios públicos al traviés del usu d’Inteligencia Artificial y Blockchain. IMPULSE (Identify Management in PUbLic SErvices) busca ser una ferramienta que facilite la dixitalización del sector públicu européu nun contestu nel la ciudadanía cada vez usa más los procesos dixitales. El Conceyu de Gijón/Xixón va centrar el desarrollu na meyora de los servicios de la Tarxeta Ciudadana.
El Conceyu de Gijón/Xixón participa nesti proyeutu col oxetivu de desarrollar una teunoloxía capaz de verificar la identidá de les ciudadanes y los ciudadanos nos procesos online de los servicios públicos de forma cenciella, segura y privada. Pa ello, el trabayu va basase nel conceutu d’Identidá Electrónica (eID), esto ye, la forma que tienen los usuarios d’identificase al traviés de la rede.
El consorciu, formáu por socios d’España, Italia, Austria, Bulgaria, Alemaña, Finlandia, Islandia, Francia y Dinamarca, ta financiáu pola Unión Europea con 4 millones d’euros, nel marcu del programa Horizonte 2020. Asturies va recibir más de mediu millón d’euros de financiación.
La crisis sanitaria actual que se vive en tol mundu limitó les interacciones personales, dixitalizando tou tipu de trámites. Esto trae dellos problemes, non solo a les persones que nun tean familiarizaes colos complexos sistemes d’identificación n’internet, sinón tamién a les que nun se sienten cómodes fapurriendo los sos datos personales per internet. Asina, los 16 socios que componen esta iniciativa van crear una ferramienta que cumpla con tolos requisitos éticos y llegales y que pueda ser d’utilidá pa los servicios públicos de tolos países de la Unión Europea, independientemente de la so cultura y grau de dixitalización.
IMPULSE va convertise na clara representación d’una modernización eficaz, útil y segura. La combinación de la Intelixencia Artificial (IA) y el Blockchain va ofrecer una ventaya teunolóxica frente a los sistemes más comunes na actualidá. No que fai al Conceyu de Gijón/Xixón, va permitir meyorar los servicios ofrecíos a la ciudadanía cola Tarxeta Ciudadana aplicando teunoloxíes últimes como Blockchain o Intelixencia Artificial pa facelos más seguros, cenciellos y fiables.
El Conceyu de Gijón/Xixón lleva apostando pola teunoloxía y los servicios qu’ofrez a la ciudadanía la Tarxeta Ciudadana dende va casi 20 años. La Tarxeta Ciudadana tien na actualidá 335.000 usuarios y usuaries, con una media de 32.000 usos diarios (un millón al mes), y 20 servicios integraos. Gracies al proyeutu IMPULSE el Conceyu quier consiguir meyorar y aumentar les sos prestaciones, amás d’apurrir a les persones usuaries mayor seguridá gracies a sistemes nuevos d’identificación y almacenamientu de la información. Siempre manteniendo como oxetivu base’l potenciar la movilidá, los vezos y conductes sociales saludables buscando meyorar la calidá de vida de la ciudadanía y establecer una meyor relación ente les sos necesidaes y los servicios públicos.
