La Oficina de Normalización Llingüística ye un elementu estructural básicu encargáu de favorecer l'usu del asturianu nos distintos servicios municipales al traviés de proyeutos dirixíos a la ciudadanía.
Pa ello, la Oficina ellabora’l Plan de Normalización Llingüística del Conceyu de Xixón, asoleya campañes informatives y de sensibilización, organiza actividaes educatives y venceyaes cola cultura tradicional d’Asturies, apoya a les empreses qu’empleguen l’asturianu al traviés d’un programa de subvenciones y ufierta información, una biblioteca especializada y un serviciu de traducción de documentos.
Información
Una de les funciones principales de la Oficina de Normalización Llingüística ye la de ser puntu d’información pa la ciudadanía, treslladando de manera diaria les últimes novedaes al rodiu de la llingua asturiana. Avérate a la Oficina de Normalización Llingüística pa falar col personal especializáu y consultar el tablón informativu. Tamién pues consultar la versión dixital del nuestru tablón al traviés de les redes sociales de la Oficina de Normalización Llingüística (“Anuncies” nes histories destacaes d’Instagram). L’equipu de la Oficina intenta responder cualesquier dulda al traviés de mensaxe priváu d’Instagram, Facebook o Twitter dientro del horariu llaboral.
Traducción
Solicita la torna de documentos del castellanu al asturianu, especialmente los que rellacionen a la ciudadanía cola Alministración o que tengan que ver con actividaes, eventos o folletos ensin ánimu d’arrequecimientu. La Oficina de Normalización va apurrite l’asesoramientu llingüísticu que necesites.
Biblioteca
Biblioteca especializada en llingua asturiana y normalización llingüística abierta al públicu de llunes a vienres, de 9 a 14 hores. L'accesu ye llibre. Nun fai falta acutar cita. Si necesites consultar la disponibilidá d’un exemplar pues consultalo n’ABSYS como toles biblioteques municipales.
Esti documentu recueye’l Plan de Normalización Llingüística del Conceyu de Xixón (aprobáu pol Plenu del Conceyu de Xixón el 1 d'agostu de 2024) qu'empobina la planificación llingüística del conceyu nel periodu 2024-2027. Recueye les midíes propuestes pa la política Llingüística del conceyu, aprovechando les fortaleces na evolución del asturianu y mirando por iguar les debilidaes, col envís de siguir favoreciendo la normalización del asturianu en Xixón. El Plan de Normalización Llingüística ta empobináu a los 5 sectores que vienen darréu: Alministración pública, Enseñanza, tresmisión familiar y mocedá, Socioeconómicu: comerciu y hostelería, Ociu, deporte y actividá cultural, Medios de comunicación y nueves teunoloxíes.
Col oxetivu de que los escolinos y les escolines tengan la posibilidá de pasalo bien al tiempu que deprenden, y sobre too, pa garantizar el derechu a facelo n’asturianu.
La Oficina de Normalización Llingüística de Xixón ye la encargada d’organizar un garapiellu d’actividaes educatives, mesmo pa Infantil y Primaria que pa ESO y Bachilleratu que valgan pa sofitar el deprendimientu del asturianu y el conocimientu de la historia y tradición cultural d’Asturies.
Esposiciones didáutiques itinerantes. Delles esposiciones de cuentos infantiles y otres temátiques en llingua asturiana. Les esposiciones empréstense a los distintos centros escolares de Xixón demientres cuatro selmanes (previa petición pel Guíame).
Xixón de novela
Conocer Xixón ye querela y nós proponemos conocela al traviés del llibru Xixón de Novela, un percorríu que, gracies a l’adautación del llibru a una APP móvil, va permitite conocer los llugares más representativos de Xixón al tiempu que t’averes a la lliteratura asturiana.
El llibru de lo más piquiñino
Una aplicación pa tablet que ta basada nel llibru físicu de la Rede de Normalización nos Conceyos, qu’ufiertaba’l Conceyu de Xixón nel Hospital de Cabueñes a les families que teníen una fía o un fíu.