La Rede Municipal de Biblioteques de Gijón/Xixón en collaboración cola Fundación Municipal de Servicios Sociales desarrolla esti programa col oxetivu d’atender les demandes de llectura, información y ociu de les persones mayores.
Comprometíes col avieyamientu activu de la población con aiciones qu’afeuten al so bienestar físicu, mental y social, les biblioteques municipales de Gijón/Xixón crearon un programa empobináu de mou especial a esti coleutivu con dos llinies d’actuación: “La biblioteca en casa” y “Salimos al to alcuentru”, que se complementen cola organización de la colección en centros d’interés con documentos sobre un mesmu tema abordáu dende dellos puntos de vista, pa facela más accesible.
Serviciu gratuitu d’empréstamu y unviu a domiciliu de llibros, revistes, música y cine.
¿A quién ta empobináu?
Empobináu a persones usuaries del serviciu de teleasistencia de la Fundación Municipal de Servicios Sociales de la ciudá de Gijón/Xixón. L’oxetivu d’esta aición ye promover la llectura y averar los recursos de les biblioteques municipales a les persones que por circunstancies tanto físiques como sociales o d’otru calter nun pueden visitales.
¿Cómo funciona?
El personal bibliotecariu establez comunicaciones telefóniques periódiques coles persones usuaries pa informales de los materiales disponibles pal empréstamu y animales a usalu, amás d’a conocer los sos gustos y intereses. D’esti mou seleiciónense y recomiéndense los documentos que más s’adauten a les sos preferencies: llibros o audiollibros, temátiques de llectura o xéneros lliterarios.
En tou casu, les persones usuaries pueden contautar cuando quieran con cualesquiera de les biblioteques municipales pa solicitar l’empréstamu d’obres. Los materiales escoyíos únviense y recuéyense gratis a casa al traviés de mensaxería. La duración d’esti empréstamu ye d’un mes, con posibilidá de renovación por un periodu asemeyáu. De toes formes, los materiales pueden devolvese en cualesquier momentu enantes de rematar esti plazu.
Trámite d’inscripción de la Biblioteca en Casa.
Serviciu d’estensión bibliotecaria qu’amplía l’aición de les biblioteques fuera del so espaciu físicu al tiempu que les da a conocer y fomenta’l so disfrute pa les persones mayores que nun les usen davezu. En definitiva, quier consiguir que’l coleutivu que frecuenta los Centros Municipales de Persones Mayores de la ciudá s’avere a les biblioteques y conoza toles posibilidaes que-yos ofrecen, non solo como centros d’información y conocimientu, sinón tamién como mediu d’ociu y socialización qu’ayuda a reducir l’aisllamientu y la soledá.
Esta aición céntrase nel coleutivu de persones de más de 55 años, pa los que s’ufierten cursos, servicios y actividaes pa reforzar y favorecer un avieyamientu activu.
Empréstamu de gafes
Si vienes a la biblioteca y nun t'alcordasti de trayer les tos gafes de llectura, nun te preocupes, podemos dexáteles. Contamos con gafes con distintes graduaciones que van adaptase a les tos necesidaes.
Empréstamu de llotes
Cesión temporal de llotes de llibros y otros documentos a los Centros Municipales de Persones Mayores de Xixón pa ser consultaos nos sos llocales o emprestaos pa les persones usuaries d'estes instalaciones.
Recursos dixitales
Recopilación d'información n'Internet pa persones mayores con enllaces a centros sociales, residencies, información llegal, ayuda a domiciliu, vacaciones, viaxes, salú, deporte, nueves tecnoloxíes, programes de radio, etc.
Recomendaciones de llibros y otros documentos sobre temes d'interés como salú, deportes, cine, ociu, novela histórica, d'aventures, negra, romántica, d'intriga... y muncho más.
