Con motivu d’esti aniversariu y coincidiendo cola celebración de la 46 Selmana de les Lletres Asturianes, inaugúrase una esposición que busca reconocer la importancia de la obra d’Andersen, tresmitidora de valores universales como la amistá, la valentía, la empatía y la imaxinación. Al traviés d’histories enllenes de fantasía y sensibilidá, los sos cuentos ufierten enseñances sobre la vida y la condición humana.
La esposición puede visitase dende güei y hasta’l 31 de mayu na sala 3 del Centru de Cultura Antiguu Institutu. La inauguración oficial tuvo llugar güei a les 11 hores.
Esta muestra destaca tamién la importancia de la traducción y l’adautación como ferramientes p’acercar estes histories a les nueves xeneraciones de llectores y pa recuperar, na llingua materna, les vivencies lliteraries de la infancia de munches persones adultes. Esta iniciativa contribúi a fortalecer la cultura y la identidá asturiana, amás de promover el valor de la diversidá llingüística.
La esposición cuenta cola collaboración de la editorial Impronta, que facilitó los derechos d’usu de los testos y les illustraciones. Les traducciones corrieron a cargu d’Irene Riera, que caltuvo la esencia emocional y la guapura del rellatu orixinal. Les illustraciones, a cargu de María Pereira, Alicia Varela y David G. Ferrero, arriquecen la comunicación visual de los cuentos.
Amás, esta esposición va tar disponible pal so emprétamu a centros educativos a lo llargo del próximu cursu escolar, favoreciendo l’accesu a materiales lliterarios y artísticos n’asturianu ente la población infantil. Asina, el Conceyu de Xixón reafirma’l so compromisu cola normalización llingüística y col fortalecimientu de la comunidá educativa.
El Conceyu de Xixón, al traviés del so Departamentu de Normalización Llingüística, súmase a la conmemoración del 150 aniversariu del fallecimientu del escritor y poeta danés Hans Christian Andersen, autor fundamental na lliteratura infantil universal.